Ang Konseptong Ukay

Sa pamagat pa lamang malalaman mo na kung ano ang nilalalaman ng blog na ito. Ang bagay tungkol sa ukay ay napakahalaga sa akin dahil nakatira ko sa lugar kung saan uso at nananatiling buhay ang ukay. Ang ukay ay mga damit na nilalako sa tabi ng daan sa gabi, sa mga lumang gusali tulad ng mga dating sinehan o bilyaran na ngayon ay punung puno ng mga nakasabit at nakasukbit sa mga pinaglalagyan ng damit para i-display. Ang mga damit na ito ay maaaring nanggaling sa mga kamag-anak na nasa ibang bansa, sa mga kapamilya na gustong magbenta ng damit dahil ang bahay nila ay mistulang isang malaking aparador ng isusuot, o kaya may supplier na pinagkukuhanan ng mga damit na ibebenta.   

Ang mga damit na ito ay siyempre pagpipilian at pag iisahin ang mga mukhang bago sa malapit ng maging basahan. Ang mga damit tulad ng t-shirt at blouses ay sinusuri kung kupas na o kung mukhang isa o dalawang beses pa lang na nagamit ay umaabot ng isangdaan hanggang dalwangdaan ang isang piraso na medyo kapresyo ng mga bagong damit kung ito ay "on sale". Sa mga damit naman na may kaunting punit, butas at mantsa na pwede pa namang daanin sa  laba at tahi ay may presyong abot kaya ng lahat. At ang huli ay mga damit na kaunti na lang eh ipapamigay na ng mga nagbebenta dahil sa mga tela na masyado ng manipis, sa mga sulsing kahit ekspertong mananahi ay hindi na magagawan ng paraan at siyempre mukha na talagang luma. Meron din namang mga damit na okay ang kulay, walang masyadong tastas at minsan nga parang hindi pa nagagamit pero pag binili mo ito at sinukat, magmumukha kang barkada ng nanay at tatay mo noong teenagers pa lamang sila.Siyempre, ang mga presyo ng mga damit na ito ay abot- kaya din marahil sa ang mga ito ay hindi masyadong nabibili. Ang mga ukay na damit sa aming lugar eh dinadayo ng mga turista. Marami ang humahanga sa mga lugar na may  ukayan at sa totoo lang, halos lahat ng lugar dito sa amin ay may ukay-ukay kaya ang ibig sabihin nun ay humahanga ang mga turista sa lahat ng lugar dito sa amin(^^)  

Dahil nga sa kasikatan ng ukay kung bakit hanggang ngayon, kahit ano pang batikos ang natatanggap ng mga ukayang ito ay sige pa rin sila sa pagbebenta. May mga balita noon tungkol sa mga sakit na maaaring makuha ng tao pag bumili ng ukay. Kung totoo ang isyung ito eh sana ubos na ang populasyon ng aming lugar.^^ meron ding mga larawan sa internet tungkol sa mga nakakahindik balahibo na ang ibang mga damit na ibinibenta ay galing sa mga bangkay. Masyado ng matalino ang mga mamimili ngayon at gamitin niyo na lang ang inyong mga gumaganang utak kung ano ang pagkakaiba ng sinusuot ng patay sa burol at libing niya.

Sikat ang ukay at dahil sikat binabatikos kaya sa mga taong patuloy na negatibo sa ukay, sabi nga sa Ingles "Get over it!" at sa mga nag ukay kahapon, nag uukay ngayon at mag uukay bukas, pwede ba ako sumama??^^


'

Ang Buhay ng Estudyante

Walang tao sa mundo ang ayaw mag aral. Lahat ng tao ay may kapasidad na matuto at may kagustuhan na palawakin ang kanyang nalalalaman. Ang hindi ko lang maintindihan sa ating lahat ay ang pakiramdam na parang hindi na matatapos ang minuto,oras,araw at taon ng pag aaral at pagtuklas at unti unti nating nararamdaman ang pagkapagod, pagkayamot at higit sa lahat ang pagkagusto sa pagtulog ng madalas. Hindi ko maintindihan ang aspetong ito pero nararamdaman ko ito at alam ko na magkakaintindihan tayo dito (dahil kahit hindi naman na ako estudyante, nag aaral pa rin ako sa sarili kong paraan and natututo pa din ako^^).

Mula sa pagkabata hanggang sa mamulat tayo sa tunay na sitwasyon ng mundo at kung gaano natin ito bibigyan ng kahulugan, natututo tayo. Kung ang pagtingin natin sa mundo ay marahas, malaswa, makulay o may pag-asa, nasa sa'yo yun, wala akong magagawa doon kasi may sarili din akong pagtingin sa mundo. Mula nung una tayong pumasok sa eskwelahan at buhatin sa ating likuran ang mga kakailanganin natin sa klase ay mararamdaman ang pagkatuwa at pag iisip sa mga bagay na pwedeng matutunan. Habang lumilipas ang panahon at patuloy tayong nananaliksik at nag aaral ng mga bagong bagay, nararamdaman natin ang pagod ang minsan kalungkutan. Ngunit! hindi lang ikaw at ako ang nakakaramdam niyan kundi lahat ng nag-aral, nag-aaral at mga taong patuloy sa pagtuklas. Dahil diyan, may mga manunulat na gumawa sa malikhaing pamamaraan ang mga sitwasyong ito upang maipahayag nila ang mga karanasan sa eskuwelahan, sa labas ng pamantasan at hanggang sa paghahanap ng mga lugar na mapagtatrabahuan at sige, mapasyalan na din.^^

Meron akong isang manunulat na sadya naman talagang malikhain sa pagpapahayag ng mga bagay  na ito. Sa katotohanan nga, binili ko lahat ng libro o hindi ko kasi alam kung may salitang ganito pero gagamitin ko na din, binili ko lahat ng komiks niya. Ang manunulat na ito ay ang talagang hahangaan mo sa kabaliwan, katatawanan at siyempre aral na naiparating niya sa lahat ng estudyante. Siya si Manix Abrera at ang kanyang asteeg na likha, and  Kikomachine!^^

 Ilan lamang ito sa mga pabalat ng mga ginawa niyang komiks. Sa totoo lang, sobra kong hinahangaan ang mga kuwento at mga bagay na sa unang tingin eh walang silbi pero kung iisipin mo, sa sobrang kapaguran mo eh, may mga naiisip ka ding walang saysay^^. Nakakatuwa ang mga kuwento niya gamit and iba't ibang katauhan at personalidad ng mga estudyante na nag aaral sa isang pamantasan sa Maynila.

Ang mga karakter sa komiks na ito ay may mga kakaibang katangian na magpapahanga, maaawa at matatawa ang mambabasa. Ako mismo ang magpapatunay na nakakatuwa ito; paano? kumpleto ang koleksiyon ko ng mga komiks na ito at sobrang alagang alaga talaga dahil bawat isa ay nakabalot ng 

plastic at hindi ko lang basta pinapahiram.(ah, pinahiram ko ng minsan tapos nayupi yung gilid kaya natrauma ako..)

Bukod sa mga nakakatuwang kaugalian ng mga karakter eh siyempre ang mga binibitiwang salita na talaga namang nakakasakit ng tiyan at ng ulo(dahil yun sa kakatawa, hindi lang kaya tiyan ang sumasakit pag sobra ang pagtawa). Ang mga salita, parirala, salaysay at mga opinyon na isinisiwalat ng mga karakter ay maaring napakalalim or sobrang babaw pero nakakatuwa pa din. bawat salita
at bawat larawan ay siguradong magpapahalakhak sa mga mambababasa.
  

  Ang mga sitwasyon naman sa bawat "comic strip" eh natatatangi sa bawat isa. may mga pangyayari sa loob ng silid-aralan, sa labas ng eskwelahan, sa isawan, sa tinatawag nilang "Comics Convention" at kung saan saan pa. May mga lugar din na sa isip mo lang mararating at kung iisipin mong mabuti ang ibang mga sitwasyon, mandidiri ka pero matutuwa ka pa din. Kumbaga kung sa telebisyon, pinag sama samang GP, PG at SPG. Bukod sa buhay-estudyante na araw-araw nilang hinaharap, may mga "strips" naman na tungkol sa gobyerno, pamahiin, at debate. Ang isang mambabasa, kung sa pagkain ay hindi masusuya sa mga nakahain na kuwento at pangyayari.

Kung hindi ka pa din naniniwala sa sinasabi ko, subukan mo bumili hindi dahil sa gusto ko patunayan sayo na maganda talaga ang komiks na ito kundi para tangkilikin mo kung ano talaga ang talentong Pilipino. Kung merong Archie Comics sa States, naniniwala ako na ito na yung katapat niya or mas higit pa. Tangkilikin mo ang sitwasyon at pangyayari na ikaw mismo ang nakakaintindi bilang Pilipinong mag-aaral at tagatuklas. Yun na!